1Cor 8 | GAM | STEP | Ipon na kandja dje ye aundo ge, una wal mindjye gale ipo god kende moro al opa awinj mal kandja dje ye aundo. Una pende kandja embe djine, nono porapora mormon ge, nomane paro we dine. Ge kandja kaima djine. Ba alla nono kandja embe djipin dal, nonekne kandjine amblo pla worbon dje pille djimbon. Ba ge man, nono una boll kane wopake ye, singare embe yembon ge, ga aglo gi dje molo, pillgi panda moye.

1 Corinthians 8

Una wal to gale ipo god kende moro al opa awinj mal Pol kandja djindo

1 Ipon na kandja dje ye aundo ge, una wal mindjye gale ipo god kende moro al opa awinj mal kandja dje ye aundo. Una pende kandja embe djine, nono porapora mormon ge, nomane paro we dine. Ge kandja kaima djine. Ba alla nono kandja embe djipin dal, nonekne kandjine amblo pla worbon dje pille djimbon. Ba ge man, nono una boll kane wopake ye, singare embe yembon ge, ga aglo gi dje molo, pillgi panda moye. 2 Una ta kandja embe djinda, na wal merke pro we djinda ba alla, une wal merke napiya. 3 Ba alla una ta God kane wopake yenda ge, God iwa ge pille kane yenda.

4 Embe mal pai pille kandja namba we djimbon? Una wal to gale ipo god kende moro al opa ye aune ge, nono wal mindjye ge nambon mo nanambon? Nono kanmon, god kende mor ge, wal kaima namor. God taimane moro, god merke namor. 5 Una pende embe djinj, god merke morka, Iwa Kerman merke mor we djinj. Kupill al morka, makimb al morka embe yenj we djinj. 6 Ba nono kanmon, god merke namor, God taimane moro. Une ge nono nane moro, une wal porapora beke yei una moro, alla nono mormon ge, nonekne pille wane namormon, nono God pille wanmormon. Alla Iwa Kerman merke namor, taimane moro. Ge Iwa Kerman Jisas Krais. Krais agle al God wal porapora beke yei alla, Krais agle al nono gun mormon.

7 Ba na kandja ipon manda djindo ge, una pillgi djinj una pende kanpol natonj. Asa god kende moro dje pi mal, ga nomane embe pa moro. Una wal mindjye ipo god kende mor al awo pagle, are ipo maket pagirka, pillgi djinj una po top to i nonj ge, ga kumbene ke yendaka, nonmon ge kune nayendo dje kaninj. 8 Kwa nambon panda God ye ye kune yenj we dje kando dje pupon ba ge man. Nanambon panda, God ye ye kune yenj we dje kando dje pupon ba ge man. Kwa nambon mo nanambon ge God ye wopake yenj we nadjinda, une nomane ge al naparo.

9 Ye wal porapora nane kune yendo ba, ye kanpol to molo nane. Man panda, ye wal midjye ge naneke, pillgi dongall nadjinj una kanneke nomane ke yendaka, kulngab yagne. 10 God kende lotu numb yero al ni numog po midjye namben, ge wambo naparo dje kanben ba, ni agan ta pillgi dongall nadjindo una ta wo kanda. Midjye ge nanambon we dje kanda ba, ni nonden al ge une aike po noi dal, yene nomane ke yenda. 11 Na wal merke pille kane yendo we dje pren ba, agan ta pillgi dongall nadjindo una, Krais iwa ge pille goi ba, ni wal merke pille kane yenden al ge, agan nomane ye ke yenden. 12 Pillgi dongall nadjinj una wal mindjye nambon kune nayendo we dje kaninj ba, ni nonden al ga kane po embe naneke, nomane ke yenda ge, ni singare ke ye kambono aunden. Alla yenden al ge, ni singare ke ye Krais aunden. 13 Na mindjye nanaka, agana pillgi dongall nadjindo una kane, yene nomane ke yenda ge, na mindjye ge kaima kaima nanano. Iwa ge kulngab yage djinda dje pille na wal mindjye nano molo po goyo.